395
ਉਹ ਅਰਥ-ਸ਼ਾਸਤਰ ਦੀ ਐਮ.ਏ.ਸੀ.। ਉਹ ਕਈ ਸਾਲਾਂ ਤੋਂ ਨੌਕਰੀ ਦੀ ਤਲਾਸ਼ੀ ਵਿਚ ਸੀ ਪਰ ਨੌਕਰੀ ਨਹੀਂ ਮਿਲ ਰਹੀ ਸੀ।
ਉਸ ਨੇ ਕੋਸ਼ਿਸ਼ ਕਰਕੇ ਇਕ ਮੰਤਰੀ ਦੀ ਸਿਫਾਰਸ਼ ਲੱਭੀ।
ਉਸ ਨੇ ਇੰਟਰਵਿਊ ਵਾਲੇ ਦਿਨ ਸਬੰਧਤ ਅਫਸਰ ਨੂੰ ਮੰਤਰੀ ਦੀ ਚਿੱਠੀ ਅਤੇ ਆਪਣੇ ਸਰਟੀਫਿਕੇਟ ਦਿਖਾ ਦਿੱਤੇ।
ਅਫਸਰ ਨੇ ਸਰਟੀਫਿਕੇਟ ਦੇਖ ਕੇ ਤਸੱਲੀ ਪ੍ਰਗਟ ਕੀਤੀ ਤੇ ਕਿਹਾ- ਹੋ ਸਕਦਾ ਏ ਤੁਹਾਡੀ ਮੈਰਿਟ ਬਣ ਹੀ ਜਾਏ।
ਕੁਝ ਦਿਨਾਂ ਬਾਅਦ ਉਸ ਨੂੰ ਪਤਾ ਲੱਗਾ ਕਿ ਉਸ ਅਸਾਮੀ ਤੇ ਕੋਈ ਹੋਰ ਉਮੀਦਵਾਰ ਰੱਖ ਲਿਆ ਗਿਆ ਹੈ।
ਉਹ ਅਫਸਰ ਕੋਲ ਗਿਆ ਤੇ ਪੁੱਛਿਆ- ਕਿਉਂ ਜੀ, ਮੇਰੀ ਮੈਰਿਟ ਨਹੀਂ ਬਣੀ ਸੀ?
ਅਫਸਰ ਮੁਸਕਰਾ ਕੇ ਬੋਲਿਆ- ਤੁਹਾਡੀ ਮੈਰਿਟ ਤਾਂ ਬਣ ਗਈ ਸੀ ਪਰ ਮੰਤਰੀ ਦੀ ਮੈਰਿਟ ਨਹੀਂ ਬਣੀ ਸੀ। ਜਿਹੜਾ ਉਮੀਦਵਾਰ ਰੱਖਿਆ ਗਿਆ ਹੈ ਉਸਦੀ ਮੁੱਖ ਮੰਤਰੀ ਅਤੇ ਦੋ ਹੋਰ ਮੰਤਰੀਆਂ ਦੀ ਸਿਫਾਰਸ਼ ਸੀ। ਮੰਤਰੀਆਂ ਦੀ ਮੈਰਿਟ ਵਿਚ ਤੁਹਾਡਾ ਮੰਤਰੀ ਤੀਸਰੇ ਨੰਬਰ ਤੇ ਆਉਂਦਾ ਹੈ।
ਸੁਰਜੀਤ ਸੂਦ
