“ਸੂਜਨ”..ਖਾਲਸਾ ਏਡ ਲਈ ਕੰਮ ਕਰਦੀ ਨੌਜੁਆਨ ਗੋਰੀ ਕੁੜੀ..ਅੱਜ ਜਦੋਂ ਦੁਨੀਆ ਦੇ ਸਭ ਤੋਂ ਖੌਫਨਾਕ ਮੰਨੇ ਜਾਂਦੇ ਇਰਾਕ਼-ਸੀਰੀਆ ਬਾਡਰ ਤੇ ਖਲੋਤੀ ਹੋਈ ਆਉਂਦੇ ਭੁੱਖੇ-ਪਿਆਸੇ ਸ਼ਰਨਾਰਥੀਆਂ ਨੂੰ ਖਾਣ ਪੀਣ ਦਾ ਨਿੱਕ ਸੁੱਕ ਵੰਡ ਰਹੀ ਹੁੰਦੀ ਏ ਤਾਂ ਲੋਕ ਆਪ ਮੁਹਾਰੇ ਹੀ ਆਖ ਉਠਦੇ ਨੇ ਕੇ ਇਹ ਪੱਗਾਂ ਦਾਹੜੀਆਂ ਵਾਲਿਆਂ ਦੀ “ਖਾਲਸਾ” ਨਾਮ ਦੀ ਉਸ ਸੰਸਥਾ ਦੀ ਕਾਰਕੁਨ ਏ ਜਿਹੜੀ ਲੋੜਵੰਦਾਂ ਨੂੰ ਭੋਜਨ ਸ਼ਕਾਉਣ ਲੱਗਿਆਂ ਓਹਨਾ ਦਾ ਮਜ਼੍ਹਬ ਰੰਗ ਜਾਂ ਨਸਲ ਨਹੀਂ ਦੇਖਦੀ! ਰਵੀ ਸਿੰਘ ਦੱਸਣ ਲੱਗੇ ਕੇ ਅਜੇ ਦਸ ਦਿਨ ਪਹਿਲਾਂ ਬਗਦਾਦ ਏਅਰਪੋਰਟ ਤੇ ਖਲੋਤਾ ਇੱਕ ਸਿਕਿਓਰਿਟੀ ਵਾਲਾ ਜਦੋਂ ਮੇਰੀ ਪੱਗ ਨੂੰ ਟੋਹਣ ਲੱਗਾ ਤਾਂ ਨਿਮਰਤਾ ਸਾਹਿਤ ਦੱਸ ਦਿੱਤਾ ਭਾਈ ਤੁਹਾਡੀ ਟਹਿਲ ਸੇਵਾ ਲਈ ਹਜਾਰਾਂ ਕਿਲੋਮੀਟਰ ਦੂਰ ਤੋਂ ਆਏ ਹਾਂ..ਥੋੜਾ ਬਹੁਤ ਮਾਣ-ਤਾਣ ਤਾਂ ਰੱਖ ਲਿਆ ਕਰੋ ਤਾਂ ਉਹ ਤ੍ਰਭਕ ਕੇ ਏਨਾ ਆਖਦਾ ਹੋਇਆ ਪਿਛਾਂਹ ਹਟ ਗਿਆ ਕੇ ਤੁਸੀਂ “ਖਾਲਸਾ ਏਡ ਤੋਂ ਹੋ..ਮੁਆਫ ਕਰਨਾ ਮੈਥੋਂ ਗਲਤੀ ਹੋ ਗਈ”
ਫੇਰ ਜਹਾਜ ਵਿਚ ਬੈਠਿਆ ਇਰਾਕ ਦੇ ਪ੍ਰਧਾਨ ਮੰਤਰੀ ਨੂੰ ਸਹਿ-ਸੁਭਾ ਹੀ ਨਿੱਕਾ ਜਿਹਾ ਟਵੀਟ ਕਰ ਦਿੱਤਾ ਕੇ “ਸ਼੍ਰੀ ਮਾਨ ਜੀ ਹੋ ਸਕੇ ਤਾਂ ਆਪਣੇ ਏਅਰਪੋਰਟ ਤੇ ਤਾਇਨਾਤ ਸਿਕੋਰਟੀ ਨੂੰ ਸਾਡੇ ਪੱਗਾਂ ਦਾਹੜੀਆਂ ਵਾਲਿਆਂ ਬਾਰੇ ਥੋੜੀ ਬਹੁਤ ਜਾਣਕਾਰੀ ਦੇਣ ਦੇ ਖੇਚਲ ਕਰ ਦਿਓ”
ਘੰਟੇ ਬਾਅਦ ਹੀ ਮੁਆਫ਼ੀਆਂ ਦਾ ਹੜ ਜਿਹਾ ਆ ਗਿਆ..ਪਹਿਲਾਂ ਪ੍ਰਧਾਨ ਮੰਤਰੀ ਫੇਰ ਗਵਰਨਰ ਅਤੇ ਮੁੜ ਹੋਰ ਕਿੰਨੇ..ਆਖਣ ਲੱਗੇ ਇਰਾਕ਼ ਤੁਹਾਡਾ ਆਪਣਾ ਏ..ਕੁਰਦਿਸ਼ਤਾਣ ਤੁਹਾਡੀ ਮਲਕੀਅਤ ਏ..ਜਿਥੇ ਮਰਜੀ ਘੁੰਮੋ ਫਿਰੋ..ਤੁਸੀਂ ਅੱਲਾ ਦੇ ਬੰਦੇ ਸਾਡੇ ਲੋਕਾਂ ਲਈ ਫਰਿਸ਼ਤੇ ਬਣ ਕੇ ਬਹੁੜੇ ਹੋ..ਸਾਡੇ ਧੰਨ ਭਾਗ ਜੇ ਅਸੀ ਪੱਗਾਂ ਦਾਹੜੀਆਂ ਵਾਲਿਆਂ ਲਈ ਕੁਝ ਕਰ ਸਕੀਏ..” ਇਹ ਉਸ ਧਰਤੀ ਦੀ ਕਹਾਣੀ ਏ ਜਿਥੇ ਅੱਜ ਦੀ ਤਰੀਖ ਵਿਚ ਬੰਬ ਸਿੱਟਣੇ ਸੌਖੇ ਤੇ ਰੋਟੀ-ਟੁੱਕ ਦੀ ਮੱਦਦ ਸਿੱਟਣੀ ਬਾਹਲੀ ਔਖੀ..! ਭਰ ਸਿਆਲ ਦੀਆਂ ਠੰਡੀਆਂ ਸ਼ੀਤ ਰਾਤਾਂ ਨੂੰ ਸੀਰੀਆ ਵੱਲੋਂ ਕਿੰਨੇ ਸਾਰੇ ਸ਼ਰਨਾਰਥੀ ਨਿੱਕੇ ਨਿਆਣਿਆਂ ਨੂੰ ਕੁੱਛੜ ਚੁੱਕੀ ਬਾਡਰ ਪਾਰ ਕਰਦੇ ਨੇ..ਕੁਝ ਨੂੰ ਸੈਕੜੇ ਡਾਲਰ ਰਿਸ਼ਵਤ ਦੇਣੀ ਪੈਂਦੀ ਏ..ਪਰ ਓਥੇ ਜਿਹੜੀ ਚੀਜ ਚੋਵੀ ਘੰਟੇ ਮੁਫਤੋ ਮੁਫ਼ਤ ਮਿਲਦੀ ਏ..ਉਹ ਹੈ..ਗੁਰੂ ਕਾ ਲੰਗਰ..ਜਦੋ ਥੱਕੇ ਟੁੱਟੇ ਬੰਦੇ ਦੀ ਤਲੀ ਤੇ ਫੁਲਕਾ ਰੱਖਿਆ ਜਾਂਦਾ ਏ ਤਾਂ ਭਾਈ ਘਨਈਆ ਜੀ ਦਾ ਸਿਧਾਂਤ ਸਾਮਣੇ ਰੱਖ ਕਦੀ ਵੀ ਅਗਲੇ ਦੀ ਜਾਤ ਨਹੀਂ ਪੁੱਛੀ ਜਾਂਦੀ..! ਦੁਨੀਆਂ ਦੇ ਤ੍ਰਾਸਦੀ ਮਾਰੇ ਬਾਕੀ ਇਲਾਕਿਆਂ ਵਿਚ ਸਹਾਇਤਾ ਵੰਡਦੇ ਹੋਏ ਸਿਰਫ ਮੁਸ਼ਕਲ ਹਲਾਤਾਂ ਨਾਲ ਹੀ ਲੜਨਾ ਪੈਂਦਾ ਏ ਪਰ ਪੰਜਾਬ ਦੀ ਆਪਣੀ ਧਰਤੀ ਤੇ ਕੁਦਰਤ ਦੀ ਕਰੋਪੀ ਦੇ ਨਾਲ ਨਾਲ ਸਰਕਾਰਾਂ ਦੀਆਂ ਸ਼ੱਕ ਭਰੀਆਂ ਨਜਰਾਂ ਨਾਲ ਵੀ ਦੋ ਚਾਰ ਹੋਣਾ ਪੈਂਦਾ ਏ..
ਕੌਣ ਕਿੱਦਾਂ ਮਦਤ ਕਰਦਾ..ਮੱਦਤ ਵਾਸਤੇ ਫੰਡਿੰਗ ਕਿਥੋਂ ਹੋਈ..ਕਿਹੜੇ ਮੁਲਖ ਚੋਂ ਕਿੰਨਾ ਪੈਸੇ ਆਇਆ..ਖਾਲਸਾ ਏਡ ਦੇ ਕਾਰਕੁੰਨਾਂ ਦਾ ਪਰਿਵਾਰਿਕ ਪਿਛੋਕੜ ਕੀ ਏ..?
ਏਜੰਸੀਆਂ ਦੇ ਬੰਦੇ ਚੋਵੀਂ ਘੰਟੇ ਬੱਸ ਇਹੀ ਸੁੰਘਦੇ ਫਿਰਦੇ ਨੇ ਕੇ ਕੋਈ ਐਸਾ ਸਿਰਾ ਹੱਥ ਲੱਗ ਜਾਵੇ ਕੇ ਅਸੀ ਦੁਹਾਈ ਪਾ ਕੇ ਸਾਰੀ ਦੁਨੀਆ ਨੂੰ ਦੱਸ ਸਕੀਏ ਕੇ ਇਹ ਪੱਗਾਂ ਦਾਹੜੀਆਂ ਵਾਲੇ ਇਨਸਾਨੀਅਤ ਦਾ ਭਲਾ ਨਹੀਂ ਸਗੋਂ ਅੱਤਵਾਦ ਅਤੇ ਵੱਖਵਾਦ ਦੀ ਪਨੀਰੀ ਬੀਜ ਰਹੇ ਨੇ..!
ਬਾਬੇ ਨਾਨਕ ਦੇ ਪੰਜ ਸੌ ਪੰਝਾਵੇਂ ਜਨਮ ਦਿਨ ਦੇ ਮੌਕੇ ਤੇ ਸੁਲਤਾਨਪੁਰ ਲੋਧੀ ਦੀ ਉਸ ਧਰਤੀ ਤੇ ਸੰਗਤਾਂ ਦੀ ਹੱਕ ਹਲਾਲ ਦੀ ਕਮਾਈ ਵਿਚੋਂ ਦਸ ਕਰੋੜ ਦਾ ਪੰਡਾਲ ਲਗਾ ਧਰਿਆ ਜਿਥੇ ਕਿੰਨੇ ਸਾਰੇ ਹੜ-ਪੀੜਤ ਅਜੇ ਵੀ ਸੌ ਸੌ ਰੁਪਏ ਦੇ ਇਮਦਾਤ ਨੂੰ ਤਰਸ ਰਹੇ ਨੇ..
ਬਾਬੇ ਨਾਨਕ ਦੇ ਸਿਧਾਂਤ ਦੇ ਅਗਵਾਕਾਰ ਸਟੇਜਾਂ ਤੇ ਖੜ-ਖੜ ਓਹਨਾ ਲੋਕਾਂ ਨੂੰ ਸਿਰੋਪੇ ਅਤੇ ਸਨਮਾਨ ਦੇ ਰਹੇ ਨੇ ਜਿਹਨਾਂ ਕਦੀ ਵੋਟਾਂ ਖਾਤਿਰ ਸੰਗਤਾਂ ਦੀਆਂ ਪੱਗਾਂ ਅਤੇ ਬਾਬੇ ਨਾਨਕ ਦੀ ਬਾਣੀ ਨਾਲ ਸਿਰਜੇ ਹੋਏ ਪਵਿੱਤਰ ਗ੍ਰੰਥ ਖੁਦ ਆਪਣੇ ਪੈਰਾਂ ਹੇਠ ਮਧੋਲੇ ਸਨ!
ਅਖੀਰ ਵਿਚ ਜ਼ੋਰ ਦੇ ਕੇ ਆਖਦੇ ਨੇ ਕੇ ਕੋਈ ਭਾਵੇਂ ਲੱਖ ਕੋਸ਼ਿਸ਼ਾਂ ਵੀ ਕਰ ਕੇ ਵੇਖ ਲਵੇ ਬਾਬੇ ਨਾਨਕ ਵਾਲਾ ਸਿੱਖੀ ਦਾ ਸਿਧਾਂਤ,ਪੰਥ ਅਤੇ ਗ੍ਰੰਥ ਕਦੇ ਵੀ ਨਹੀਂ ਮਰ ਸਕਦੇ..
ਹਾਂ ਉਸ ਵੇਲੇ ਖਤਰੇ ਦੀ ਘੰਟੀ ਜਰੂਰ ਵੱਜ ਉਠੇਗੀ ਜਦੋਂ ਸਾਡੀ ਅਗਲੀ ਪੀੜੀ ਗੁਰੂਆਂ ਵੇਲੇ ਦਾ ਸੁਨਹਿਰੀ ਇਤਿਹਾਸ..ਸਤਾਰਵੀਂ ਸਦੀ ਦੇ ਵਰਤਾਏ ਭਿਆਨਕ ਘਲੂਕਾਰੇ ਅਤੇ ਸੰਤਾਲੀ ਚੁਰਾਸੀ ਅਤੇ ਉਸ ਮਗਰੋਂ ਦੀਆਂ ਗਿਣ ਮਿਥ ਕੇ ਕੀਤੀਆਂ ਗਈਆਂ ਸਮੂਹਿਕ ਨਸਲਕੁਸ਼ੀਆਂ ਆਪਣੇ ਮਨੋ ਵਿਸਾਰ ਦੇਵੇਗੀ..!
(ਸਤਾਰਾਂ ਨਵੰਬਰ 2019 ਨੂੰ ਵਿੰਨੀਪੈਗ ਵਿਚ ਕੀਤੇ ਸੰਬੋਧਨ ਦਾ ਸਾਰ ਅੰਸ਼)
ਅਗਿਆਤ
Unknown
